ယမန်နေ့ နံနက်ပိုင်း မိုးသည်းထန်စွာ ရွာသွန်းမှုကြောင့် တောင်ဒဂုံနှင့် မြောက်ဒဂုံ မြို့နယ် အချို့တို့တွင် ရေကြီးရေလျှံကာ စာသင်ကျောင်းနှင့် စက်ရုံ အချို့ပိတ်ထားကြရသည်။
“မနက်ကတည်းက ကလေးကိုကျောင်းပို့တော့ ရေကဒူးလောက်ရောက်နေပီ။ နောက် မနက် ၁၀နာရီလောက်ကျတော့ ကလေးတွေ ထိုင်ခုံမှာထိုင်လို့ မရအောင်ကို ရေတွေတက်လာနေလို့ ကျောင်းတွေပိတ်လိုက်ရတယ်” ဟု ဒေသခံတစ်ဦးက ပြောပြသည်။
အကူအညီလိုအပ်သူများအား တပိုင်တနိုင်ကူညီရေး အဖွဲ့များက တတ်နိုင်သရွေ့ ကူညီပေးလျှက်ရှိကြသည်။
လူနေရပ်ကွက်အတွင်း ရေများဝင်ရောက်မှုကြောင့် တောင်ဒဂုံမြို့နယ်မှ အမက ၁၁၊ ၁၂၊ ၁၉၊ ၂၂နှင့်၂၃အစရှိသော မူလတန်းကျောင်း ၁၀ကျောင်း ၀န်းကျင် မနက်ကတည်းက ပိတ်ထားခဲ့ရသည်ဟု ဒေသခံတစ်ဦးက ပြောသည်။ ရေ၀င်ခဲ့သည့် နေအိမ်အရေအတွက် ခန့်မှန်းခြေ ၅၀၀ ၀န်းကျင်ရှိသည်ဟု အကူအညီပေး သည့်အဖွဲ့တဖွဲ့က ပြောသည်။
တောင်ဒဂုံမြို့နယ်တွင် နေထိုင်သည့် သွေးလှူအကူအညီပေးရေးအဖွဲ့- Blood Group မှ ကိုညီညီက “ မနက်က မိုးအဆက်မပြတ်ရွာပြီးတော့ ၉နာရီခွဲလောက်မှာ မိုးကောင်းပြီး ရေပါလာတယ်။ အဓိကကတော့ မြေနိမ့်ပိုင်းတွေမှာ ပိုရေ၀င်တယ်၊ လက်တပြန်စာ အိမ်တွေဆိုရင် လူတွေလုံးဝ နေလို့မရတော့ဘူး” ဟု ပြောသည်။
သက်ဆိုင်ရာမှ ရေ၀င်လျှက်ရှိသည့် အိမ်များအတွက် အခြားရပ်ကွက်များမှ ထမင်းထုပ် ကောက်ခံပြီး ဝေငှပေးသော်လည်း လုံလောက်မှု မရှိဟု ရပ်ကွက်နေသူများ၏ ပြောသည်။
“ မနက်ကတည်းက ကျွန်မတို့ အိမ်တွေထဲ ရေတွေလိမ့်ဝင်လာတာနဲ့ နီးစပ်ရာအကူညီတောင်းတော့ ညနေပိုင်းမှာ အလှူရှင်တွေ ထမင်းထုပ်လာ လှူကြတယ်။ ရေတက်တော့ အလုပ်သမားတွေ အလုပ်နားရတယ်။ အဲမှာတနေ့လုပ် တနေ့စားတွေ ပိုဒုက္ခရောက်ကြရတယ်”လို့ တောင်ဒဂုံ ၅၄ရပ်ကွက်တွင် နေထိုင်သူတစ်ဦးက ပြောပြသည်။
ရေဘေးဒုက္ခရောက်သူများအတွက် BG မှကိုညီညီနှင့် ကမ်းလက်များ အဖွဲ့မှ သွားရောက်ကာ ထမင်းထုပ် ၃၀၀ကျော်ခန့် ဝေငှပေးကြောင်းသိရသည်။
“ လာဝေတော့ ကျေးဇူးတင်တယ်။ တချို့ဆို အဖိုးကြီးအဖွားကြီး နှစ်ယောက်ထဲ ရှိတဲ့အိမ်တွေမှာ ထမင်းဟင်း မချက်နိုင်ဘူးလေ” ဟု တောင်ဒဂုံ ၅၄ရပ်ကွက်တွင် နေထိုင်သူ မချိူက ပြောသည်။
ထို့သို့ရေ၀င်မှုသည် ယခင်နှစ်များထက်ပိုမို များပြားကြောင်း အချို့နေရာများတွင် ရေတက်သဖြင့် ကား အသွားအလာ ရပ်ဆိုင်းသွားကြောင်းလည်း သိရသည်။
No comments:
Post a Comment